یادِ سید سالار

منقبت حضرت سید سالار مسعود غازی علیہ الرحمہ بہرائچ شریف یوپی انڈیا
عرس پاک 14 رجب المرجب

نتیجۂ فکر: سلمان رضا فریدی مصباحی، مسقط عمان

جہادِ حق کے علمدار سیدِ سالار
یدِ حسین کی تلوار سیدِ سالار

تمہارے فیض نے دل کی زمین کو سینچا
شعور کر دیا بیدار سیدِ سالار

فضاے ہند میں لائے اذان کا نغمہ
ضیاے روزہ و إِفطار سیدِ سالار

صنم کدوں کو بناڈالا ذکرِ رب کا چمن
بہارِ مسجد و مینار سید سالار

زمین ہند ، ترے آنے سے ہوئ مسعود
ہے ذرے ذرے کو اقرار سید سالار

نہ کیوں ہو مرکزِ انوار ، شہرِ بہرائچ
کہ اس میں ہے ترا دربار سید سالار

تری حیات ہے اسلامی عظمتوں کا فروغ
عظیم ہے ترا کردار سید سالار

بنی معلمِ دستورِ حق تری ہستی
وقارِ دیں کے اے معمار سید سالار

خمیدہ سر ہیں ترے آگے کفر کی لہریں
دفاع حق کی اے دیوار سید سالار

تری شہادت عظمیٰ پہ بے شمار سلام
فداے احمدِ مختار سید سالار

ترے اصول ہیں جب تک نگاہ میں غازی
نہ ہوگی حق کی کبھی ہار سید سالار

دلوں پہ آج بھی سکہ تمہارا چلتا ہے
تمہی ہو وقت کے سردار سید سالار

ترے چراغوں کی زد میں ہے ظلمت باطل
ہے جاری نور کی یَلغار سید سالار

یزیدیوں کی جفائیں ہیں طالبِ بیعت
لبِ وفا پہ ہے انکار سید سالار

تری پناہ میں ہے کاروانِ اہلِ حق
تو کیا بگاڑیں گے اغیار سید سالار

تمہاری راہ میں آئے جو مشکلوں کے پہاڑ
کیا ہر ایک کو مسمار ، سید سالار

تری خودی سےحرارت ہے نبضِ ملت میں
بلند جس سے ہیں افکار ، سید سالار

تمہارا دستِ کرم مظہرِ ید عیسیٰ
مٹا ہے جس سے ہر آزار سید سالار

ترے مریضوں کوحاجت نہیں دواؤں کی
نظر ہے شافئِ بیمار ، سید سالار

کَڑکنے والی ہے باطل پہ پھر تری بجلی
بتا رہے ہیں یہ آثار سید سالار

یہ موج کفر ہمیں کیا بھلا ڈبوئے گی
ترے کرم کی ہے پتوار سید سالار

تری حیات کا رستہ ہے پُر بہار اتنا
قدم قدم پہ ہے گلزار ، سید سالار

ملی ہے تجھ سے فریدی کی فکر کو خوشبو
مہک اٹھے گُلِ اشعار سید سالار

الدال علیٰ خیر کفاعلہ (شیئر کریں)

ہمارےبارے میں ہماری آواز

ہماری آواز ایک غیر جانبدارانہ نیوز ویب سائٹ ہے جس پر آپ سچی خبروں کے ساتھ ساتھ مذہبی، ملی،قومی، سیاسی، سماجی، ادبی، فکری و اصلاحی مضامین اور شعر وشاعری پڑھ سکتے ہیں۔ یہی نہیں آپ خود بھی ہمیں اپنے پاس پڑوس کی خبریں اور مضامین وغیرہ بھیج سکتے ہیں۔

یہ بھی پڑھیں

نعت رسول: طائرِ مدینہ تو! لے کے دردِ دل جاتا

مرشدی تاج الشریعہ علیہ الرحمہ کے ایک مصرع پر طبع آزمائی کی کوشش نتیجۂ فکر: …

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے