منقبت: نہ آئے گا دوسـرا صدیق

منقبتِ پاک، خلیفۂ اول ، یار غار نبی، حضرت سیدنا ابوبکر صدیق ، رضی اللہ تعالیٰ عنہ
یومِ وصال ٢٢ جمادی الاٰخرہ

نتیجۂ فکر: سلمان رضا فریدی مصباحی، مسقط عمان

نبی کی چشمِ محبت کا معجزہ صدیق
لبِ رسولِ معظم کی ہیں دعا صدیق

صداقتوں کا وہ مہتاب ، تا ابد نایاب
نہ آیا ، اور نہ آئے گا دوسرا صدیق

اُنہی پہ اُن کے خصاٸص کی ہوگئ تکمیل
کہ ہیں ریاضٸِ عظمت کا داٸرہ صدیق

قسم خدا کی یہ رفعت ہے لازوال ان کی
جہاں میں سب سے بڑے ، بعدِ انبیا صدیق

ہے اُن کی ذات مُشارُُ اِلَیہ ، قرآں میں
نبی کے ساتھ ہیں اک فَردِ "اِذھُما” صدیق

وہ چرخِ عشق رسالت کے نیَّرِ اعظم
ہر ایک سینۂ مٶمن کی ہیں ضیا صدیق

حیاتِ پاک میں آقا کی ہر ادا محفوظ
ہیں اک صحیفۂ اوصافِ مصطفیٰ صدیق

نشانِ حُبِ نبی بن گیا وجود ان کا
ادب کی شَکلِ مُجَسَّم ہیں با وفا صدیق

عقیدتوں کے وضو سے جسے پڑھیں کونین
سراپا نعتِ نبی ، نغمۂ ثنا صدیق

نبی کا مُصحفِ رخ ، جس پہ تھا شبِ ہجرت
بنے تھے غار میں وہ رحلِ خوشنما صدیق

اُنھیں مزاج شناسِ رسول کہتے ہیں
تھے اس قدر دلِ سَرور سے آشنا صدیق

پسند آئ خدا کو بھی ان کی طرزِ وفا
نبی کی چاہ میں تھے ایسے خوش ادا صدیق

وہ جانثاری و وارُفتگی وہ سوز و گُداز
کہاں ملے گی زمانے میں ، ماسوا صدیق

رسولِ پاک کا دیوانہ اُن سا کوئی نہیں
ہیں بحرِ عشق کے اک لعلِ بے بہا صدیق

رہی دفاعِ نبی میں فَصِیلِ جاں ان کی
جری و صابر خوددار و با صفا صدیق

جہاں میں جتنے وفاؤں کے لفظ راٸج ہیں
سبھی کے معنی و تشریح و ترجمہ صدیق

شرافتیں بھی قسم کھائیں جن کی عزت کی
ہوۓ ہیں ایسے شَرَف ساز و پارسا صدیق

نہیں صداقت و حقانیت میں جن کی مثال
وہ حق نواز و حق افروز و حق نما صدیق

عُمَر ، غنی و علی بھی سنورتے تھے جس سے
اصولِ حق کے وہ پُرنور آٸینہ صدیق

اُسی ادارے کے تلمیذ ، عاشقانِ رسول
نصـابِ الفتِ سَـرور کا مدرسہ صدیق

زمانے والو چلو ! ان سے عظمتیں لے لو
ہر اک عروج و بلندی کا ہیں پتہ صدیق

زبانِ صدق و یقیں سے اُنھیں پکارو تو
کریں گے دُور زمانے کی ہر بلا صدیق

بلالِ حبشی کو پوشاکِ حُرّیَت بخشی
ہیں مومنوں کے مددگار و آسرا صدیق

خِرَد نے پوچھا کہ ہے کون عشق کا معیار ؟
قلم اٹھا کے فریدی نے لکھ دیا صدیق

الدال علیٰ خیر کفاعلہ (شیئر کریں)

ہمارےبارے میں ہماری آواز

ہماری آواز ایک غیر جانبدارانہ نیوز ویب سائٹ ہے جس پر آپ سچی خبروں کے ساتھ ساتھ مذہبی، ملی،قومی، سیاسی، سماجی، ادبی، فکری و اصلاحی مضامین اور شعر وشاعری پڑھ سکتے ہیں۔ یہی نہیں آپ خود بھی ہمیں اپنے پاس پڑوس کی خبریں اور مضامین وغیرہ بھیج سکتے ہیں۔

یہ بھی پڑھیں

امیر المومنین عثمان بن عفان رضی اللہ تعالیٰ عنہ

طالب خیر : محمد انس قادری رضوی پیدائش اور نام و نسب: آپ رضی اللہ …

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے